Ҷаласаи мазкурро иҷрокунандаи вазифаи директори Муассисаи давлатии “Маркази ёрии ҳуқуқӣ”- Раҳим Зафар Ҳаким оғоз намуда, доир ба нуқтаҳои асосии паёми Президенти Ҷумҳурии Тоҷикистон “Дар бораи самтҳои асосии сиёсати дохилӣ ва хориҷии ҷумҳурӣ” ба Маҷлиси Олии Ҷумҳурии Тоҷикистон, ки 28 декабри соли 2023-юм ироа гардид, муфассал суҳбат намуда, моҳият ва муҳимияти нуқтаҳои асосии паёми Президенти Ҷумҳурии Тоҷикистонро дар самти пешгирии гаравидани ҷавонон ба ҳизбу ҳаракатҳои ифротӣ ва баланд бардоштани маърифати ҳуқуқӣ ва дар ин замина баланд бардоштани маърифати экологии мардуми Тоҷикистон изҳори ақида намуд.
“Таъкид карда шуд, ки бо талошҳои пайвастаи сарвари давлат миллати тоҷик дар ҷаҳон ҳамчун миллати бофарҳанг, соҳибтамаддун, созандаву ободкор ва ташаббускор шинохта шудааст. Имруз моро зарур аст, ки кирдору рафтори фарзандонамонро пайваста назорат намуда, нагузорем, ки аъзоёни гуруҳҳои тундрав аз хориҷ тариқи шабакаҳои иҷтимоӣ ақидаи фарзандони моро дигар кунанд, онҳоро ба кори ношоистаи ғайриинсонӣ ҷалб намоянд. Мо бояд дар ин вазъиятӣ пуртазод зираку ҳушёр бошем ва ваҳдату сулҳу оромиамонро нигоҳ дорем дар иҷрои ин кор ҳар як сокини мамлакат бояд бетараф набошад.
Ҳамзамон вобаста ба низоми нави ёрии ҳуқуқӣ дар сохтори Вазорати адлияи Ҷумҳурии Тоҷикистон ва муҳтавои Қонуни Ҷумҳурии Тоҷикистон “Дар бораи ёрии ҳуқуқӣ”, Қонуни Ҷумҳурии Тоҷикистон “Дар бораи ватандӯстии шаҳрвандон”ва Қонуни Ҷумҳурии Тоҷикистон “Дар бораи масъулияти падару модар дар таълуму тарбияи фарзанд” баромад намуд.
Баъдан сухани навбатӣ ба Ректори Донишкадаи такмили ихисоси Вазорати адлияи Ҷумҳурии Тоҷикистон муҳтарам Собирзода Исфандиёр дода шуд. Дар тақвияти мавзӯҳои болозикр Собирзода Исфандиёр ҳамзамон дар бораи Конститутсияи Ҷумҳурии Тоҷикистон, Кодекси мадании Ҷумҳурии Тоҷикистон дар боби мерос муфассал баромад намуда, бо мисолҳои ҳаёти ба иштирокчиён мазмуни қонунҳои номбурдаро шарҳ дод.
Мудири бахши ташкили ёрии ҳуқуқии якумдараҷа – Бобозода Фаридун Сайфидин ва Ҳуқуқшиноси давлатӣ дар ноҳияи Кӯшониён – Сироҷев Муҳиддин вобаста ба тақвияти ҳамкории ёрдамчиёни ҷамъиятӣ ҷиҳати расонидани ёрии ҳуқуқӣ ба шаҳрвандон тибқи Қонуни Ҷумҳурии Тоҷикистон “Дар бораи ёрии ҳуқуқӣ” ва “Дастурамал оид ба кор бо ёрдамчиёни ҷамъиятӣ” баромад намуданд. Дар ҷаласа аз ҷониби иштирокчиён барои беҳтар намудани ҳамкорӣ дархосту пешниҳодҳо манзур карда шуда дар доираи мушкилиҳои ҳуқуқӣ мубодилаи афкор сурат гирифт.